《或者存在的不存在職業–「秘密」交易員》
「你要我講Stephanie鍾意邊個？點解要話你知先？」
「大佬！一秒大佬一世都係大佬！你可憐下我呢個死肥仔初入情海，受盡相思之苦嘅份上，你話過我知啦。」
「不如咁，你講一件全校都冇人知嘅秘密畀我聽，當交換。」
十幾年前呢件中學嘅小事，令我知道「秘密」對某啲人嚟講係好有價值嘅。
佢哋不惜用錢買、用人哋嘅秘密換、甚至係自己嘅秘密換。
為咗偷窺人哋，不惜出賣自己。
之後嘅成長路，我一直收藏唔同人嘅秘密，連名帶姓，做埋Excel表，配合Facebook興起，人際關係透明度大增，大學時代已經有唔識嘅人走上門，問我一句：
「你有冇關於XXX嘅秘密？我想買。」
一開始係金錢交易，但慢慢我覺得唔划算，於是我更改為：
「你想知？OK！除咗小量手續費外，聽一個秘密，要留低兩個秘密。」
『以密易密』
多數，其中一個，要係你自己嘅秘密。
＝＝＝＝＝＝＝＝
就係咁過咗十幾年，我嘅database已經夠我開間叫「密室」嘅公司。
呢度配置咗一級嘅測謊機器，但地方唔大，因為我隔三個月就會搬一次，以防萬一。
短期租約，永久秘密。
每日嘅Appointment係一個男人，而佢想知嘅秘密係關於一個女性：
「個女仔全名同Facebook Acc名都喺晒度，你有冇佢嘅秘密。」
我冷笑：「冇就唔會叫你上嚟啦。你同佢咩關係呀。」
佢有啲尷尬，但支吾數秒後都和盤托出：「未婚妻。」
我打開Notebook，全神貫注：「唔使擔心，嚟得呢度，十居其九都係男女問題。但試過有個人知道自己老婆殺個人喎。啲秘密可以好激架」
佢大驚：「唔係呀？殺人喎！」
我嗤之以鼻：「殺人啫，再恐怖都有，每個人都有錯事架啦。想偷窺，又想做膽鬼呀？你未婚妻嘅秘密，仲敢唔敢聽呀？」
佢吞一吞口水：「敢！」
望一望Notebook後，我皺皺眉頭：「I ~Feel~ so~ Sorry~」
「佢之前一直都係lesbian，鍾意TB。佢呢段歷史刻意唔畀人知。或者呢家都…哈哈哈~睇係點睇啦下」
= = = = = = = = = = =
由我嘅人脈網所知，呢個男人最後都將未婚妻變成妻子。
合理嘅，其實呢樣秘密都唔算係咩，好易接受。
不過，之後有一個Appointment，今次就係一個女人。
我問佢：「你同呢個男人又咩關係呢？」
佢吞吞吐吐：「結咗婚冇耐...」
「即係老公啦，ok，我講佢秘密你知。」我暗覺好笑。
「你老公嘅初夜係同一個TB發生嘅。呢件事世界上原本得三個人知，呢家你係第四個。」
佢愕然，但都鎮定：「哦...咁都冇咩嘅...後生貪玩，對方點講都係女仔...可能貪新奇...可能...」
= = = = = = =
我暗覺好笑，因為有兩樣嘢我冇講到，
1. 你老公喺結婚前搵過我。
2. 呢個同你老公有關係嘅TB，就係你之前嘅情人。
世界很大，秘密更大；
人與人之間好闊，但關係好窄。
或者「秘密」成為一度屏障，
令所有人保持一份微妙。
之後幾個月，我收到老公嘅查詢，
佢想問我有冇更多老婆嘅秘密。
我答「有」。
再一陣，到老婆問有冇更多老公嘅秘密。
我答「有」。
基於「以密易密」嘅方式，
佢哋得到對方秘密，
同時放低自己秘密，
所以，持續下去只會了無止境。
同一張床嘅佢哋，
愈來愈熟悉對方，
卻唔知道對方都愈來愈熟悉自己。
明明答案就喺眼前，偏偏要畀我賺錢。
我坐喺大班椅上面，嘆一口氣。
愈知得多秘密，愈知得多光怪陸離嘅事，
就覺得眼前嘅世界，只係經過過濾嘅繁華。
所有人都鍾意「知道對方最多」，
同時「唔畀對方知自己知太多」，
我哋雖然群體生活，但永遠孤獨一人。
每個人都唔係非黑即白，
每個人都只係七彩顏色。
＝＝＝＝＝＝＝＝＝＝＝＝＝＝＝＝＝
*本次職業提案from : Sung Cheuk Yiu
其他不存在的職業系列Album：https://goo.gl/xh4bbt
如喜歡可以輕輕一Like~
其中推薦：
《葬禮召集人》：https://goo.gl/ziaHMO
《職場公敵》：https://goo.gl/zxb4PG
《禮物追尋使》：https://goo.gl/SbcByB
《賣情感的人》：https://goo.gl/ffjnfy
Ig:cheungson88
*會慢慢Up嘢上去
Search